• Nadia Monn, scolasta primara

Luvratori „graun, frina e paun“ a Morissen


La gievgia, ils 8 d'october, essan nus dall’emprema e secunda classa da Rabius serendi a Morissen per visitar il luvratori „graun, frina e paun“ che vegn purschius dil museum regiunal.

All’entschatta havein nus gidau da purtar neutier lenna per far fiug en fuorn. Silsuenter havein nus fatg la pasta da paun. En la pasta s’audan las suandontas ingredienzas: frina, sal, levon ed aua. Suenter che la pasta ei turschada flot e bein sto quella ruassar e levar in dètg mument. Cunquei ch’ei dat gentar pizza essan nus tuts i a far cumissiuns el Volg da Morissen. Cu nus essan returnai havein nus tuts formau in paun e preparau il sgarabriec (paun empleniu cun meila). Duront ch’il paun coi el fuorn, havein nus fatg ina viseta el mulin. Igl ei stau fetg impressiunont da veser co il graun vegneva mulaus pli baul. Ussa freda ei propi bein da paun cotg. Tgei bellezia pauns che vegnan tratgs ord il fuorn. Per finir astga mintgin aunc metter sin la pasta da pizza quei ch’el ha bugen. Suenter cuort mument el fuorn havein nus magliau ina buontad pizza. Bien appetit!

Cun buna luna essan nus tuts returnai a casa. Igl ei stau in bellezia di plein surpresas e plascher. Nus havein viu bia caussas novas ed havein saviu emprender ina massa.

Engraziel da cor a Bettina, Jacobina ed al muliner Toni che han accumpignau nus a moda fetg simpatica e cumpetenta tras quei di.

#frina #graun #primara #Rabius #MOrissen #mulin

11 Ansichten

© 2015 Consorzi da scola Sumvitg-Trun

Fotografias: Lotar Tomaschett, scolaras e scolars dil Consorzi