• Adrean Caviezel, scolast da classa 6. classa

Viseta el museum dalla natira


Da present muossa il museum dalla natira a Cuera ina exposiziun sur dil cavriel.

Demai che nus tractein quei animal en biologia, eis ei bunamein stau clar che nus fageien ina viseta a quels da Cuera.

Mardis, ils 27 d’october ha il viadi ella capitala da nies Cantun giu liug.

Igl ei bi da saver contemplar ils scolars mintgaton ordeifer la stanza da scola.

Jeu, sco scolast, less bugen resumar quei di cun la suandonta expressiun: „grondius“

Seigi quei lu en connex cun l’exposiziun - Il pedagog dil museum, Flurin Camenisch, ha menau nus cun sia gronda savida en caussa e sia enorm simpatica moda e maniera da luvrar culs scolars tras l’exposiziun. Ils scolars han lu aunc mess il punct sigl „i“ cun lur grondiusas presentaziuns tiels differents posts dall’exposiziun (predicat: fetg bien).

En connex cun il bien gentar el McDonald’s - Gie, malgrad ch’in scolar ha manegiau che cheu vegni il scolast ad anflar nuot per el?!

En connex cun la grondius'aura - Duront gentar eisi strusch stau aschi frestg sco tier nies viadi d’atun.

En connex cun il fetg divertent viadi cul tren – naturalmein engiu ed ensi – e lu buca d’emblidar (mirau ord vesta dallas scolaras e dils scolars) en connex cun il temps che nus havein astgau guder giu Cuera, senza il scolast e sia gidontra, la Rita (in grond Dieuspaghi a ti da nus tuts).

Jeu selegrel gia sin nies proxim eveniment...

#museum #primara #biologia #Cuera #Sumvitg

7 Ansichten

© 2015 Consorzi da scola Sumvitg-Trun

Fotografias: Lotar Tomaschett, scolaras e scolars dil Consorzi