• Venanzi Nay, scolast da classa 5. classa

In segn giu da Sumvitg


Gia baul igl atun han nos scolasts da cant a Sumvitg, Toja e Stefan, giu l’idea da menar si enzacu in musical culs affons dalla tschunavla e sisavla classa. Igl emprem ein els i alla tscherca d’ in toc. En romontsch dat ei deplorablamein buca bia da quei material. La finala han els survegniu il musical “Es Zeiche vom Himmel” da Markus Hottiger dils scolasts da Rueun. Lezs han giu menau si quei toc avon biars onns cun lur scolars. Silsuenter han Toja e Stefan mirau da perschuader ils auters collegas da Sumvitg per la caussa. Suenter cuortas resalvas ein tuts stai dil meini ch’ins vegli far uonn da Nadal enzatgei special. Gartegiar sa aschi in project mo sche tuts stattan davon l’entira caussa.

Gia avon las vacanzas d'atun han las emprovas da cant entschiet, valeva ei gie da preparar in tschuppel canzuns novas. Ils affons ein stai incantai per la caussa ed aschia era motivai dad emprender. Ussa valeva ei aunc da procurar per il text romontsch. L’idea ei stada naven dall’entschatta che mintga affon sappi sepresentar sin tribuna, era sch’igl ei forsa mo per ina pintga rolla. Il scolast Venanzi ha saviu surprender in ton dalla tranlsaziun dalla scolasta Maria Cavelti da Rueun. Per ch’ei detti rollas per mintgin ha el adattau il toc da Rueun a nos basegns e per part aunc scafffiu sez differentas rollas.

L’entschatta december havein nus entschiet cun las emprovas dallas differentas scenas. Sco gia menziunau fuvan ils affons motivai dad emprender lur rollas. Igl ei lu stau da procurar pil maletg sin tribuna, per vestgadira e per differents requisits. Sin ina moda ni l’autra ein tut ils collegas stai involvai. Stefan e Toja ein stai responsabels per la part musicala, scolast Venanzi ha giu la reschia, la scolasta Iris ha procurau per la vestgadira, la Zita ha procurau che tuts sepresentien sin tribuna els dretgs costums ed il scolast Adrean ha procurau per ils bials placats e giu il grev pensum da tener a mistregn quels che stueven spitgar davos las culissas. Nus havein aunc giu il cletg che Clau Maissen cul saxofon ei separticipaus. Ensemen cun siu fegl Lucas ed il Janos vid la batteria, La Silvana vid la flauta traversa, la scolasta Toja vid il clavazin ensemen cun differents auters scolars vid instruments havein nus giu in ver orchester.

Ils 22 da december ha giu liug l’emprova generala e la sera la presentaziun principala. Nus havein astgau presentar il musical avon in sala fullanada. Tut ils plazs fuvan occupai. Ils affons han dau cun plascher e perschuasiun lur rollas. Ins astga dir ch’ei seigi gartegiau da fascinar il publicum cun nossa presentaziun. Igl applaus frenetic ed ils schinumnai "standing ovations" alla fin dalla producziun ein stai la beinmeritada pagaglia per tuts, per affons e magistraglia.

Alla gallaria clicar cheu!

#musical #teater #Insegngiudatschiel #Sumvitg #scolaprimara #primara

32 Ansichten

© 2015 Consorzi da scola Sumvitg-Trun

Fotografias: Lotar Tomaschett, scolaras e scolars dil Consorzi