• Adrean Caviezel, scolast da classa 6. classa

Ils retgs da Sumvitg-Trun


Vargada la fiasta da Nadal e la midada digl onn, spetgan biars la viseta dils treis retgs. In usit che vegn menaus atras cheu tier nus gia dapi decennis.

Dils otg tochen ils diesch da schaner han ils retgs e las reginas fatg viseta en las casadas dallas vischnauncas da Trun e Sumvitg. Ils scolars dalla tschunavla e sisavla classa han mintgamai la cuida d’astgar esser duront entgins dis retgs e reginas.

Malgrad quella gronda e strentga lavur duront quels dis ein els cun grond anim e plascher vid lur pensum. Gnanc la malaura che havess propi astgau s’entardar per dus ni treis dis ei vegnida da prender naven il plascher ad els. Nos scolars ein sedai gronda breigia da presentar quei bi usit a moda plascheivla ed jeu sco scolast responsabel engraziel ad els zun fetg persuenter.

Per la gronda part dalla glieud secapescha ei bunamein da sesez ch’ils retgs fan viseta entuorn Buania. Jeu haiel astgau organisar uonn per l'emprema gada quei usit e denton fatg stem: Per che tut funcziuni aschi bein, drova ei ina massada gidontras e gidonters. L’entira organisaziun da quei bi usit ei veramein ina sfida per in e scadin pertuccau.

Sco involau en quella nundetg gronda organisaziun da quei usit hai jeu astgau veser e cunzun sentir cun tgei grond engaschi tut ils pertuccai ein vidlunder, per il beinreussir dil cantar retgs.

A mintga gidontra ed a mintga gidonter seigi engraziau cheu aunc ina gada grondamein cun in sincer DIEUS PAGHI. Senza Vus fuss quei bi usit buca realisabels!

Sco ils davos onns va era uonn il recav allas fundaziuns Missionsprokur St. Joseph Ilanz, Tür auf - mo vinavon, project caritativ d'affons Urpi-Wasi a Cusco - Peru (Artechel ord La Quotitdiana), ed all'ovra Centros Sociales Cristo Obrero (Artechel ord La Quotidiana). Las missiuns gest numnadas vegnan, grazia al grond engaschi dils retgs, sponsoradas culla biala summa da frs. 6'700.--.

Proceder alla gallaria clicar cheu...

#retgs #primara #Trun #Sumvitg #Rabius #Surrein #Cumpadials #Zignau #cant

0 Ansichten

© 2015 Consorzi da scola Sumvitg-Trun

Fotografias: Lotar Tomaschett, scolaras e scolars dil Consorzi