• Stefan Gabriel, menader da scola

Prevenziun tenor il sistem dalla SIG sil scalem superiur


Gia daditg ei la lavur sociala da scola tema ed il team scolastic ha cul sustegn dil Cussegl da scola evaluau numerusas pusseivladads. Evaluar munta era refierer ed igl ei stau in liung process dad anflar ina metoda che cunvegn alla cultura da nossa scola.

Suenter haver menau atras ina interrogaziun igl onn vargau cun vies agid, preziai geniturs, e cun agid dallas scolaras ed ils scolars essan nus i alla tscherca. La sligiaziun anflada sin l'entschatta digl onn da scola 2017/18 ha finalmein pudiu perschuader.

La finamira ei da buca dall'entschatta enneu engaschar ina persuna specialisada, mobein da specialisar las scolastas ed ils scolasts. Aschia sa la prevenziun haver liug mintga di enteifer l'instrucziun e vegnir reagau gest tenor sin situaziuns a moda coordinada en mintga scalem.

Il SIG (Institut Svizzer per la prevenziun da violenza) accumpogna nus duront quei process. Il SIG ei sespecialisaus sin la prevenziun da violenza. Dapi pli che 20 onn lavuran els cun las metodas las pli modernas che lubeschan da francar il cuntegn a moda efficazia e persistenta tiels scolars.

Impurtont ei da saver che violenza ha diversas fatschas ed ei la finala mo in'expressiun simptomatica che semuossa pér alla fin. Q.v.d. la problematica entscheiva gia bia pli baul ed aschia eis ei la finamira da gia saver prevegnir a talas situaziuns cun elaborar gia ordavon tematicas dall'educaziun psicosociala. Quei ein tematicas sco p.ex. Nua ein mes cunfins e nua ein ils cunfins da tschels? Co saiel jeu sentir e communicar mes cunfins e co saiel jeu encorscher ils cunfins da miu vis-à-vis? etc.

Margot Gammeter, responsabla dil SIG per nossa regiun, ha communablamein cul cerchel scolastic dil scalem superiur tschentau ensemen ils basegns e las finamiras dalla prevenziun. A caschun da nossa furmaziun interna dils 25 d'october han las scolastas ed ils scolasts ur ussa empriu d'enconuscher in instrumentari per la practica.

Sco proxim pass vegn dunna Gammeter a visitar tut las classas per elaborar cun ellas ils 4 pli impurtonts temas dalla prevenziun da violenza:

  • sligiar conflicts

  • respectar cunfins

  • deescalar provocaziuns

  • furmaziun da team

Dunna Gammeter elaborescha culs scolars igl instrumentari, il qual la scolasta ed il scolast sa silsuenter utilisar da tut temps el mintgadi en situaziuns da conflict e da violenza.

Igl emprem pass ei ussa pia fatgs. Ussa vala ei seleger en, far las empremas emprovas e rimnar las empremas experientschas. Il process ei initiaus ed jeu sundel spannegiaus sil resultad. La primavera vegnel ad envidar vus, preziai geniturs, ad ina sera dad informaziun pertuccont nies project.


95 Ansichten

© 2015 Consorzi da scola Sumvitg-Trun

Fotografias: Lotar Tomaschett, scolaras e scolars dil Consorzi