Cun spért fair e cumbativ al di da sport cantunal d' unihockey a Domat


Ils 2 d'avrel 2016 ein la scolaras ed ils scolars dalla 3. classa superiura dil Consorzi da scola da Sumvitg-Trun semiserai l'emprema ga cun la ferma concurrenza cantunala el giug d' unihockey. L' equipa dallas giuvnas ha contonschiu il miez-final e l'equipa dils giuvens ha per la lètga buca contonschiu il quart-final.

Cun motivaziun e grond engaschi ein las duas equipas dil scalem superiur da Sumvitg-Trun sebessas el cumbat encunter la ferma concurrenza cantunala el giug d 'unihochey.

Las giuvnas ein encaminadas da victoria tier victoria ed han spiars mo in giug ella runda da gruppa e quei cun 2:3 encunter la ferma equipa da Cuera dalla scola Quader. Aschia han ellas contonschiu suveranamein il quart-final. Leu han ellas battiu en in giug pleina tensiun l'equipa dallas scolaras da Domat cun 3:2. El miez- final han las giugaduras dall' equipa "Las Truvitgas" battiu sco liunessas encunter las adversarias da Claustra. Il davos han las forzas ed il cletg da giug denton decidiu en disfavur da noss' equipa.

Malgrad quella sperdita amara san las giuvnas esser loschas da figurar enteifer las quater meglieras equipas da scola populara d'unihockey dil Grischun, dil reminent ina bastiun digl unihockey svizzer.

Era l'equipa dils giuvens ei partida el turnier cun buns resultats. Denton han ils giugadurs stuiu seperschuader ch'il nivel da giug d'unihochey ei ella capitala ed ella regiun dils Tschun Vitgs surprendenta. Malgrad che l'equipa ha tratg tut ses registers ha ella per pauc buca cuntonschiu il quart-final. Denton sa l'equipa dils "Sutrucs" esser loscha d'esser ina dallas meglieras equipas da scola enteifer las regiuns cantunalas.

Las equipas d'unihockey dalla 3. superiura dil Consorzi da scola Sumvitg-

Trun han representau nossa scola formidablamein al di da sport cantunal d'unihockey. Cun lur prestaziuns e lur simpatica e faira preschientscha al turnier han els dau perdetga per l' impurtonza dall'educaziun e scolaziun sportiva en scola.

Allas giugaduras ed als giugadurs s'auda perquei nossa gratulaziun, reconuschientscha ed engraziament.


Davosas publicaziuns
Arcun

© 2015 Consorzi da scola Sumvitg-Trun

Fotografias: Lotar Tomaschett, scolaras e scolars dil Consorzi