Pign e grond en cuschina


Che nus dalla scoletta, savessen cuschinar ina gada ensemen culs gronds, ord da quella idea eis ei vegniu realitad.

Mardis ils 26.4. e gievgia ils 28.4. eis ei stau aschilunsch e nus essan sentupai cun ils scolars dil scalem ault e lur scolasta Ruth Demont en cuschina dalla scola. Ils scolars gronds cun lur scolasta han fatg in cordial beinvegni a nus e lu ha ei era gia giu num da semetter vid la lavur per ch`il gentar vegni era ad uras sin meisa.

In mument era ei sco en in furmicler, tgi fageva il dessert, tgi haveva da tagliar si ils legums, far sosas da dips , far giu truffels ed auters havevan da pinar tier ils Chicken nuggets... e sco davos lu era aunc metter a meisa.

Ils gronds han giu pazienziuna, mussau e schau gidar ils pigns dapertut. Igl ei stau in bi mirar sco tuts segidan in cun l`auter.

La finala, cu tut ei stau cuschinau ein tuts semess a meisa ed han gudiu ensemen il buontad gentar. Ei ha dau Chicken nuggets (fatg sez, bein capiu) Schlosskartoffeln, legums cun differentas sosas da dips, salata e la finala aunc ina buontad rulada da farbuns!

Il di ei gartegiaus. Tuts han schau gustar il gentar ed ei ha dau beinenqual legher discuors denter grond e pign.

Per ils pigns dalla scoletta, e segir era per ils scolars dil scalem ault ei quei stau ina speziala e nunemblideivla experientscha. In grond ENGRAZIEL FETG a tuts.


Davosas publicaziuns
Arcun

© 2015 Consorzi da scola Sumvitg-Trun

Fotografias: Lotar Tomaschett, scolaras e scolars dil Consorzi