Parti da Halloween ella Casa Depuoz


Nus vivin integraziun

La giuvna, Sarah Cirardo che terminescha primavera sia scolaziun sco pedagoga sociala, ha dumandau il consorzi dalla scola da Sumvitg/Trun sch’els fussien promts da collaborar ad in project integrativ. Giavisch ei stau ch’ella sappi collaborar cun scolars dil scalem superiur. Il giavisch da ses clients era d’organisar ina parti da Halloween.

Bugen havein nus dau suatientscha a quei giavisch, il cumplicau ei denton adina da far ir si bein igl urari ch’ils scolars munchentien buc memia bia lecziuns. La 3. reala ei stada la classsa ch’il team da scolasts ha elegiu per sengaschar en quei project. In motiv che gest quella classa ei vegnida elegida ei che nus havein ins scolara en classa che viseta la scola ella Casa Depuoz. Pia in bien motiv per la 3. reala d‘emprender d’enconuscher e savischinar alla scola dad ina da nosssas scolaras. Nus havein elegiu dus termins per la collaboraziun. Secapescha ei stau giavischau ch’ils scolars visetien la parti da Holloween il gliendisdis sera, ils 31 d’october ella halla dalla Casa Depuoz.

Gabriela Cabalzar

Venderdis, ils 30 da settember 2016

La Sarah vegn tier nus en scola per che nus sappien segidar cun carstgauns cun in impediment. Nies pensum ei da zambergiar ensemen cun cussadents dalla Casa Depuoz fallians che vegnan duvrai per la decoraziun dalla halla a caschun dalla parti da Halloween. Previu era che daplirs cussadents dalla Casa Depuoz visetien la scola ed emprendien d’enconuscher nus. Mo sco la Sarah ha declarau a nus ein ses clients magari schenai e 4 dad els han buc giu la curascha da vegnir. Dus cussadents ein vegni, l’Anna ed il Flavio han giu plascher da zambergiar ensemen cun nus. Els han duvrau in tec temps e capientscha tochen ch’els ein stai „scaldai en“. Nus havein buc astgau far memia bia canera, demai che quei havess fatg vegnir nossas visetas tut malsegiras. Alla fin dalla lecziun havein nus ina detga massa fallians zambergiai che la Sarah sa prender cun ella. Ils dus cussadents han cun in surrir cordial priu cumiau dalla classa e nus havein empermess che nus vegnien en quater jamnas si tier els a far viseta.

Marisa Deplazes

Venderdis, ils 28 d’october 2016

Nus havein astgau ir il venderdis a visitar la scola e la casa da dimora dalla Casa Depuoz. L’Anna che haveva visitau nus en scola spitgava gia cun plascher sin nus. Il Flavio era a luvrar, sco nus essan vegni sissu ston era ils cussadents carschi ir a luvrar duront in cert temps dil di, quei tut tenor lur habilitads. Il Flavio ha oz il pensum da ligiar ensemen las pintgas monas, quellas per dar en fiug en pégna che vegnan vendidas.

Sco emprem ha la Sarah declarau a nus empau l‘ infrastructura e la historia dalla Casa Depuoz. Suenter essan nus vegni parti en gruppas, ina ei ida sin viadi atras las differentas partiziuns dalla Casa Depuoz e las autras han giu da cular e fixar la decoraziun en halla. Interessant ei stau da saver mirar co ils cussadents habiteschan, els vivan sco en ina „wg“ ed han drizzau en las stanzas semegliont sco tier nus a casa. Naturalmein croda ei si ch’ins sto dapertut haver bien plaz per saver carrar cun sutgas da rodas. Nus essan vegni retschevi cordialmein da tuts cussadents, mo era dil persunal che lavura leu. Duront pausa ei vegniu offeriu a nus in migiel sirup e fretgs, ils giuvens han perfin saviu schar o lur energias da dar ballapei silla plazza giuado.

Celine Deplazes

fotografias: Alessia Cajochen


Davosas publicaziuns
Arcun

© 2015 Consorzi da scola Sumvitg-Trun

Fotografias: Lotar Tomaschett, scolaras e scolars dil Consorzi