2. cl. Rabius, viseta en la scarsinaria a Mustér

Dapi l’entschatta dalla scola havein nus dalla 2. classa Rabius il tema launa e nuorsa. Il gliendisdis, ils 31 d’october essan nus stai a Mustér per visitar la veglia scarsinaria. La Laurenzia Cajacob ha mussau a nus la launa tundida da nuorsas ch’ei aunc tschuffa. Silsuenter ha ella declarau a nus co ei lavavan pli baul la launa cun savun special en gronds curtès. Lu havein nus astgau admirar las grondas maschinas da scarsinar. Quellas grondas maschinas han rodas cun fins dents che van entuorn e fan aschia fin la launa. Il resultat ei ina launa fina e loma. Mintgin da nus ha era astgau empruar da scarsinar a maun cun dus barschuns cun fins dents. Quei va vess e drova la dètga forza. Pli baul vegneva la launa colurada mo cun caussas naturalas sco per exempel cun pelletschas da tschaguolas dalla claustra da Mustér. La launa scarsinada vegn la finala aunc filada cun la roda da filar. Era quei ha la Laurenzia mussau a nus. Quei ei nuota ina sempla lavur, nus havein astgau muentar la roda cun far ir il pedal cul pei.

Igl ei stau fetg bi ed interessant ella scarsinaria. Nus havein viu ed empriu ina massa. Ei ha fatg gronda impressiun da veser tgei gronda lavur che las dunnas da pli baul prestavan tochen ch’ei havevan il resti finiu.

2. classa Rabius

Nadia, Zoe, Roc e Sandro

cun scolastas Iris, Esther e Nadia