Plan d'instrucziun 21 - Occurrenza da "kick-off"

Dabia eis ei vegniu tschintschau dil plan d'instrucziun 21 ils davos onns. Lantschaus igl onn 2006 ha el finalmein contonschiu las scolas grischunas.

Mardis suentermiezdi, ils 29 da november, ein tut las scolastas e tut ils scolasts dallas scolas da Sumvitg-Trun e Breil seradunai en sala da cultura a Trun all'emprema occurrenza en connex cul plan d'instrucziun 21. Gia d'uriala san ins s'informar davart il niev plan d'instrucziun ellas medias ed el www. Tuttina eis ei stau in mument tut special dad udir las empremas informaziuns dils referents. Ils inspecturs Alexi Nay e Vigeli Jacomet han dau ina survesta sur dallas finamiras centralas dil plan d'instrucziun 21 e sur dalla realisaziun ed introducziun dil tal ellas scolas grischunas.

Secapescha ch'in suentermiezdi tonscha gnanc raschieni da dar sclariment davart tut ils aspects e tut las noviziuns ed entginas damondas san aunc buca vegnir rispundidas finalmein. Denton han ins era astgau constattar ch'il pass tier il niev plan d'instrucziun ei gnanc aschi gronds cunquei ch'ei vegn per gronda part gia instruiu el senn da quel.

Massa aua vegn aunc a cuorer dil Rein giu entochen ch'il PI21 contonscha allura cugl onn da scola 2018/19 era las stanzas da scola. Tgei ch'ei denton finfatg ei ch'il plan d'instrucziun vegn a vegnir. Ed igl emprem pass per nus ei fatgs.