2. superiura ad Eastbourne GB
Journey from Surselva to Eastbourne
Duront ina lecziun d’engles avon bien e bein in onn ei l’idea naschida da far in viadi egl exteriur per mirar sche nus vegnessen a frida en ina tiara jastra cun nossas enconuschientschas digl engles. Detg e fatg!
La dumengia vargada essan nus setschentai al plaz aviatic a Turitg suenter ina intensiva e legra jamna en l' Engheltiara. Secapescha selegravan nus era da puspei veser nossas famiglias.
La jamna vargada ei stada per nus scolars e scolaras dalla secunda classa superiura dil Consorzi da scola Sumvitg Trun ina jamna tut speciala. Nus havein astgau passentar ad Eastbourne ina jamna cun intensiv trenament d'engles e quei duront las vacanzas da primavera.
Eastbourne schai el sid dall'Engheltiara alla riva dalla mar ed ei in marcau enconuschents per sias bunas scolas d'emprender engles. Ina da quellas senumna St. Giles International. En quella scola essan nus ed aunc biars auters scolars digl entir mund stai duront in’jamna cun la finamira da slargiar nossas enconuschientschas digl engles. Nus havein astgau habitar en famiglias che prendan si scolars, porschan dimora, solver e tscheina. Entginas famiglias procuravan era per cuort’uriala. Il gentar gudevan nus comunablamein cun ils ulteriurs scolars ella cantina dalla scola. Era quei ei stau per nus in' experientscha extraordinaria. Aschia havein nus empriu d’ enconuscher auters giuvenils. Il suentermiezdi havevan nus temps per autras activitads. In suentermiezdi havein nus cuschinau cookies, in autra gada havein nus visitau Beachy Head. Mo savens mavan nus sper la mar. In mument nunemblideivel ei segiramein stau cu nus havein fatg bogn ella mar, e quei da tutta ferdaglia.
Nus havein mussau e trenau nossas cumpetenzas el mintgadi, seigi cun ir cun bus, cumprar en, dumandar suenter la via ed era cun empustar e magliar spisas nunenconuschentas. Nus essan fetg engrazielvels e cuntents che nies scolast da classa Armon Bearth e la scolasta d’engles Monique Huonder ein s’engaschai cun tgierp ed olma per saver realisar quei project. Naven dalla planisaziun alla realisaziun sco era cun accumpignar nus ein els s'engaschai per nus. Nus essan returnai cun massa novas impressiuns e biaras bunas experientschas.
Thank you very much
Scolars e scolaras dalla secunda classa superiura dil Consorzi Sumvitg Trun
