2. superiura: Viadi a Berna


Viadi a Berna

Ils 4 da settember ei la 2. superiura dil Consorzi da scola Sumvitg/Trun ida cun auto da posta a Berna. Sin quei viadi ha dunna Nay e scolast Salvatore accumpignau nus. Il viadi a Berna ha cuzzau entuorn tschun uras. Cu nus essan arrivai egl albiert da giuventetgna vein nus magliau enzatgei dil saccados. Suenter gentar han quels dalla recepziun dau a nus las clavs per las combras. Sco pli emprem vein nus fatg si ils letgs. Suenter esser stai en combra ha il gir da fotos, che dunna Nay ha preparau, entschiet. Nus vein giu dad ir pil marcau da Berna entuorn, far fotografias da loghens specials e rispunder a damondas. Cu tuts havevan finiu il gir, essan nus serimnai avon igl albiert da giuventetgna. Allas 18:15 uras vein nus magliau tscheina. Cuort suenter tscheina essan nus semess sin via el center da bowling. Avon quei center vein nus fatg gruppas da bowling. Il center era plitost gronds. Nus vein survegniu treis pistas. Quei ei stau per biars da nus ina nova experientscha. Igl ei stau ina fetg emperneivla e legra sera. Quella sera vegn a star per adina en nossa memoria. Circa allas 21:00 uras essan nus turnai anavos egl albiert. Arrivai egl albiert vein nus fatg tualetta. Ellas combras veva ei dad esser ruaus naven dalls 22:00 uras. Scolast Salvatore ei vegnius la damaun a clamar nus. Nus vein magliau solver allas 8:00 uras, vein pachetau tut nies uorden e vein astgau metter ei egl auto da posta. Nus essan serendi el niev museum da communicaziun. Leu ha in um mussau a nus differentas exposiziuns. Gl’emprem ha el mussau a nus in’exposiziun da bia uorden dalla historia ed alla fin ha el aunc presentau a nus in niev robot. Quei ei stau fetg interessant sco era legher per nus. Suenter havein nus luvrau en gruppas. Ellas gruppas vein nus stuiu rispunder a damondas che nus vevan dad anflar el museum. Alla fin dalla viseta al museum essan nus turnai egl albiert da giuventetgna. Da miezdi havein nus astgau eleger nua che nus mein a gentar. Suenter gentar havein nus stuiu serimnar avon la Casa federala. Nus vein stuiu ir atras ina controlla dalla polizia e vein spitgau tochen che Martin Candinas ei vegnius tier nus. Lu ha el mussau a nus bia dalla Casa federala. Quei grond baghetg ha fatg gronda impressiun a nus. Nus vein empriu fetg interessantas caussas davart la historia svizra. Suenter quei bi mo era stregn di essan nus i staunchels egl auto da posta. Il viadi ha semegliau cuort e nus essan arrivai saunamein a casa. A casa vevan nus ina massada da raquintar e mussar. Nus tuts fussen stai bugen aunc in tec pli ditg a Berna.

En num dalla 2. superiura,

Laurens, Ronja e Paula

#Superiura #2superiura #Trun #Viadi

Davosas publicaziuns
Arcun

© 2015 Consorzi da scola Sumvitg-Trun

Fotografias: Lotar Tomaschett, scolaras e scolars dil Consorzi